TEMA 3 : DUNYA PENEMU
UNIT 12 : BEDAGANG

TEMA  : DUNYA ENSERA ENGGAU CHERITA
UNIT 9 : PENGAWA MAYA UJUNG MINGGU

TEMA  : DUNYA DIRI EMPU
UNIT 2 : KERESA RAMA

Saut Tanya Semantik, Fonetik & Fonologi, Morfologi enggau Sintaksis Jaku Iban

SEMANTIK

1. Ngena chunto ke seriran, beri penerang senentang chara bekenaka tanda sekang.

2. Terangka nama reti konotatif enggau reti denotative, lalu beri chunto ti seriran.

3. Beri chunto ayat ti seriran lalu terangka nama reti harmoni enggau nyata.

4. Ngena chunto sempama ke seriran, beri fungsyen tauka guna sempama dalam raban bansa Iban.

FONETIK ENGGAU FONOLOGI

1. Fonem /m/ dikumbai fonem idul bilabial bemunyi. Bepelasarka chunto siti leka jaku, pejuraika enggau silik chara ngena sereta kereban artikulasyen ti dikena ngasilka fonem /m/.

2. Terangka chara ngasilka munyi urup [p] lalu beri chunto leka jaku ke seriran.

3. Tulis baru leka jaku ti diripihka di baruh tu ngena simbol fonetik ti engkeman.

i.	manyi
ii.	kelaung
iii.	chire
iv.	kerat
v.	changka

4. Jaku English ti ngembuan patah sebut ‘tion’, ‘ssion’, ‘shion’ tauka ‘sion’ lebuh disepil ke dalam jaku Iban berubah nyadi ‘syen’ tauka ‘sion’. Terangka bakani sepil nya tau berubah, lalu disempulangka enggau chunto ti seriran.

SINTAKSIS

1. Beri dua iti chunto leman penerang dalam frasa adjektif.

2. Padahka tiga proses ningkil dalam konsep ayat tumbuh.

3. Terangka proses ningkilka frasa predikat ba sebagi ari frasa predikat lalu beri chunto ayat ti engkeman.

4. Jaku bantu aspek dibagi ngagai tiga renggat. Padahka tiga renggat nya lalu chunto iya ti engkeman.

MORFOLOGI

1. Beri chunto penambah kepit ba jaku adjektif enggau jaku tugas.

2. Terangka nama reti penambah selit enggau chunto penambah selit ti bisi ba dalam jaku Iban.

3. Nama reti jaku nama menyana, bagi iya lalu beri chunto leka jaku ti seriran.

4. Padahka reti jaku ganti nama lalu beri chunto ba tiap bagi jaku ganti nama ti bisi ba dalam jaku Iban.

Sintaksis Jaku Iban

DEFINISYEN

Dalam jaku Iban, sintaksis tu beguna amat dikena meri penerang ngagai ke nyemetak agi senentang konsep linguistik kelimpah ari deka nemu konsep jalai jaku Iban. Nitihka Padang enggau Chemaline (2011), dalam bup Sintaksis Jaku Iban, sintaksis tu siti pampang penemu linguistik ke mansik proses nempa ayat, baka nusun leka jaku dalam ayat enggau kaul leka jaku dalam siti-siti ayat.. Leka jaku sintaksis tu diambi ari jaku English iya nya ‘syntax’. Nyadi leka jaku nya asal iya datai ari jaku Yunani ‘suntaxis’ ti berindik ari sakum dua leka jaku tauka komponen iya nya ‘sun’ reti iya begulai sereta ‘tassein’ reti iya tusun. Dia alai, sintaksis tu tadi mai reti atur nusun leman jaku ke nyadi ayat ke menuku sereta leman ke dikumbai nya nyengkaum leka jaku, klausa, sereta frasa. Sintaksis tu reti iya ditu penemu ke betungkapka tukuh struktur enggau konstruk ayat ti nentuka atur tauka ukum jalai jaku ke bepelasar ba ripih jalai bejantilka leka jaku, nusun leka jaku, sereta raban leka jaku dikena nempa ayat. Nitihka bup Tatabahasa Dewan (2010), sintaksis tu tau dikumbai kitai siti bidang penemu jaku ke mansik tukuh, struktur, enggau pasuk tauka konstruk ayat. Kitai mega tau meratika agi bidang sintaksis tu siti apak pansik senentang ukum jalai jaku ke nyadi pun ngagai chara beturuka enggau nusun leka jaku tauka gempung leka jaku dikena ngaga ayat dalam siti-siti jaku. Abdullah et.al (2006), dalam bup  Sintaksis madahka sintaksis tu mega siti cabang penemu jaku ke mansik tukuh, struktur enggau nempa ayat. Sintaksis ukai semina mansik proses ngaga ayat tang mega ukum-ukum ke nentuka bakani leka jaku nya ditusun dalam ayat. Pekara ti dipansik ba sintaksis iya nya ayat, klausa enggau frasa

Fonetik Enggau Fonologi

1.0      Definisyen

Nitihka penemu Padang enggau Chemaline (2011), dalam bup seduai iya Fonetik enggau Fonologi, pansik munyi jaku ti diasilka organ artikulasyen nya dikumbai fonetik ti mansik produksyen enggau persepsyen munyi jaku. Fonetik ulih dibagi ngagai tiga bansa, iya nya fonetik artikulasyen, fonetik akustik enggau fonetik auditori. Nya alai fonetik begunaka pengawa mansik tiap-tiap leman munyi. Fonetik akustik tu fonetik ti bekaul enggau tukuh fizikal munyi. Ambi ke chunto baka frekuensi enggau amplitude ti nyerapung antara mulut enggau pending. Fonetik akustik mega dikangau fonetik fizikal. Pansik ti bekaul enggau penteba fizikal munyi jaku. Fonetik artikulasyen mega dikangau fonetik fisiologi. Iya ti mansik senentang rengka tauka organ artikulasyen dalam sesebengkah munyi jaku. Beguna dikena ngasilka munyi jaku maya bekomunikasyen. Fonetik auditori tu mega dikangau fonetik ninga. Nyadi fonetik  tu dikena mansik chara mending enggau persepsyen munyi jaku.

    Nyadi, fonologi tu siti bidang ke mansik sistem sekeda munyi dalam sesebengkah jaku mensia sereta negika tukuh asal sistem munyi jaku nya. Iya betungkapka lalu bebidaka tukuh munyi jaku sesebengkah jaku dikena nentuka atur enggau tukuh sekeda munyi jaku. Pia mega iya betungkapka kaul entara beberapa leksikal ti nirika ayat.

Nya alai, fonologi nerangka pasal sekayu munyi ti diasilka mensia, betungkapka lalu nyeritaka pasal sistem munyi semua jaku ke dipansutka, sekalika disebut mensia enggau betul tauka enda. Iya mega megai siti tanggung pengawa iya nya mansik pola entak sebut tauka intonasyen. Munyi ke enda dipansik ba dalam fonologi iya nya baka nerakan, ngensung, nyangir, batuk  enggau mayuh agi. Munyi  jaku deka ditusun dalam sistem ti mandangka bida antara jaku nya analisis ari apak fonem, fitur, distingtif tauka ke bukai ti seriran nitihka teori ke dikena.

Nitihka penemu Siti Hajar Abdul Aziz (2008), dalam bup Bahasa Melayu I madahka fonetik tu siti leka jaku ti datai ari jaku Greek ke disebut phone reti iya munyi tauka sura nyawa, iya nya pansik senentang munyi-munyi ti disebut mensia. Iya mega ngemeratka ngagai leka jaku ‘ fon ‘ tauka munyi jaku enggau chara munyi jaku nya diasilka , didinga enggau diinterpetasionka. Iya mega madahka fonologi tu iya nya siti pansik senentang sistem bunyi jaku enggau baka ni bunyi jaku nya diasilka. Lufti Abas (1975), dalam bup Linguistik Deskriptif dan Nahu Bahasa Melayu madahka fonetik tu belajarka semua bunyi ke disebut nengah mulut mensia, baikka munyi jaku, bunyi ukai bunyi jaku, tauka bunyi marginal, sereta meri lambang fonetik ngagai munyi diri empu.

   Banding sereta bida entara fonetik enggau fonologi tu iya nya fonetik tu pansik senentang gaya asal produksyen enggau persepsyen munyi jaku ti diasilka lalu fonologi tu pansik senentang sistem munyi sesebengkah bansa jaku enggau gaya asal sistem iya. Fonetik ulih dibiah ngagai tiga bansa iya nya fonetik artikulasyen, fonetik akustik enggau fonetik auditori. Lalu fonologi tu pansik senentang kaul siti leka jaku enggau leka jaku ke bukai ti dikena ngaga ayat. Kelimpah ari nya, fonetik tu mega mansik semua elemen munyi tang fonologi tu semina mansik pola intonasyen. Fonetik ngasilka transkripsyen fonetik ke semua munyi jaku semua mensia. Nyadi fonologi tu ngasilka sistem sepil sesebengkah bansa jaku. Iya mega deka mansik kaul pola-pola intonasyen ke bisi nyadi.