Morfologi Jaku Iban

Definisyen Morfologi

Nitihka Padang anak Luna enggau Chemaline anak Osup (2011), morfologi sesebengkah bansa jaku nya jalai nempa leka jaku. Morfologi jaku Iban nya bidang penemu ti betungkapkan struktur tukuh enggau raban jaku. Iya endang siti bidang ti kompleks. Morfologi mega tau dipeda nyadika jematan ti besabungka kaul sintaksis enggau fonologi jaku. Morfologi dikumbai bekaul enggau pansik munyi sebut jaku. Kebuah pia laban iya endang ngemeranka pansik pasal gaya leka jaku ti datai ari munyi sebut. Iya bekaul enggau pansik sintaksis laban ari leka jaku iya tau didijir nyadi frasa, klausa enggau ayat ti mai reti.

Tukuh Leka Jaku Iban

Dalam jaku Iban mayuh chara nempa leka jaku. Pampang tukuh leka jaku tu dibagi ngagai enam bengkah tukuh iya nya tukuh jaku tunggal, tukuh jaku tumbuh, tukuh jaku turu, tukuh jaku betandu, tukuh jaku bekaling subut enggau tukuh jaku puntang. Chunto leka jaku ti betukuh tunggal iya nya badas, danji enggau bulan. Bisi mega leka jaku ti ditempa ari proses meri penambah baka berubat, awakka enggau betalatka. Kelimpah ari nya, leka jaku Iban mega bisi ditempa ari tukuh jaku turu baka tengah hari, beg sandik enggau betubuh bisi. Leka jaku Iban mega bisi betukuh bekaling sebut baka kaya raja, indu lelaki, kaban belayan enggau bidik lansik. Enda tinggal mega, jaku Iban mega bisi betukuh jaku puntang. Ambika chunto baka enggi kita ti dipuntangka nyadi engkita enggau enggau kami ti dipuntangka nyadi engkami.

Tukuh Jaku Tunggal  

Leka jaku tunggal iya nya leka jaku ti nadai nerima penambah tauka nadai nengah proses beturuka tauka betanduka leka jaku. Tukuh jaku tunggal tu bisi dua bengkah iya nya jaku tunggal ti ngundan siti patah sebut enggau jaku tunggal ti ngundan dua patah sebut tauka lebih. Ari sukut patah sebut, leka jaku tau ngundan siti patah sebut tauka lebih ari siti patah sebut. Patah sebut tau datai ari siti vokal (V) aja, siti vokal begulai enggau siti konsonan (K), tauka siti vokal bekaling enggau beberapa iti konsonan. Konsonan tau datai ari mua vokal tauka ari belakang vokal tauka datai seretai ari mua enggau ari belakang. Lalu pia mega konsonan tau datai beraban (KK). Kelimpah ari nya, akronim mega masuk dalam raban jaku tunggal. Akronim nya jaku kedut ti dipenyadi ari urup pun leka jaku tauka sakum patah sebut ti keterubah ari dijir siti rambai jaku, disebut tauka ditulis nyadi siti leka jaku ti entap, menyana sereta bisi mai reti.

 

1.1.1      Jaku tunggal siti patah sebut

No.	Pola	Chunto leka jaku
1.	VV	ai, au
2.	KV	wa, ti, ju, ni, ke, wi
3.	VK	it, as
4.	KVK	bah, sen, bab, bup
5.	KKVK	stor, draf
6.	KVKK	teks, bank, volt
7.	KKKV	skru
8.	KKKVK	skrip, straw

1.1.2      Jaku tunggal dua patah sebut

No.	Pola	Chunto leka jaku
1.	V+VK	aum, aus, ais
2.	V+KV	isu, ila, adi, iri, aka
3.	V+KVK	emas, ubat, ikan, ulat, akih, uyut
4.	VK+KV	ambu, ampa, undi, unta, enda
5.	VK+KVK	umpan, untak, empat, ambun, indik, undur
6.	KV+V	dua, tua, bau, bai, kia, rua
7.	KV+VK	kait, pait, daun, gaul, jauh
8.	KV+KV	jala, pasu, kera, pala
9.	KV+KVK	bakul, tukul, kapal, tugal, kilat
10.	KVK+KV	sendi, danji, tanju, dunju, sambi, tampi
11.	KVK+KVK	bintang, mintis, sampal, tanduk
12.	KV+VV	buai, tuai, diau, biau